Argazkia: cdbidasoa.eus

Bidasoa Irunek garaipen bikaina lortu du Artalekun Logroño La Rioja 41-29 mendean hartuta. Hasieratik amaieraraino nagusituta, Irungo taldea garaipenaren jabe izan da lehen minututik, 4-1eko partzialarekin, Jon Azkue (2), Julen Aginagalde eta Asier Nietoren golei esker. Bisitarien saiakerak gorabehera, eszenatoki orokorra ez da inoiz aldatu, eta 12. minutuko 10-6az geroztik, kanpoko entrenatzaileak lehen hutsartea eskatzera behartuta ikusi zuen bere burua.  Hala ere, atsedenaldirako abantaila  sei golekoa izan zen (21-15).

Jacobo Cuetararen mutilek bigarren zatiari berdin ekin zioten, eta zortzi minutu eskasetan, errenta 9 goletara zabaldu zuten. Alde horrek ahalbidetzen zuen jada Logroñoko lehen itzuliko partidan jasotako desabantaila (39-33) iraultzea. Ez hori bakarrik, azken minutuetan tentsio lehiakorrari eustearen ondorioz, Bidasoa Irunek ASOBAL Ligako partida batean sartutako golen marka hautsi zuen (41-29), 1996/1997 denboraldian Caja Pontevedra Teucroren aurka erdietsi zituen 40 golak baino bat gehiago (40-20).

Ligan buru-belarri sarturik, hurrengo hitzordua astegun buruzurian izango da, eta ez nolanahikoa: derbia Iruñean asteazkenean, Ostegun Santu bezperan, Helvetia Anaitasunaren aurka (21:30ean). Taldeaz berriz ere Artalekun gozatzeko ez da gehiegi itxaron beharko: datorren larunbatean, apirilak 8, 17:00etan Cisne galiziarraren aurka.

Fitxa teknikoa

41 – Bidasoa Irun (21+20). Harbaoui, Cavero (6, 4 p.), Salinas (2), Azkue (4, 2 p.), Asier Nieto (5), Zabala (1), Aginagalde (4); Skrzyniarz, Ugarte (2), Gey-Emparan (1), Furundarena, Barreto (1), Francisco da Silva (2), Gorka Nieto (7, 1 p.), Pacheco (1), Rodríguez (5).

29 – Logroño La Rioja (15+14). Pérez, Preciado (3), Keita (1), Palomino (3), Rodríguez (4), Rivero (2), David Cadarso (5, 4 p.); Clavijo, Romeo, El Korchi (1), Rubiño (3), Luciano (3), Ortiz, García (4), Eduardo Cadarso.

Partzialak. 5-2, 7-5, 11-6, 14-9, 18-12, 21-15; 25-17, 28-19, 32-24, 34-26, 38-29, 41-29.

Bestelakoak. ASOBAL Ligako 22. jardunaldia Artalekun, 1.614 zaleren aurrean. Neurketa hasi aurretik, Ander Elosegik ohorezko sakea egin zuen, bere kirol ibilbideari jasotako omenaldiaren ostean. Gainera, minutuko isilunea gorde zen Agustina Martiarena Zumalakarregi zenaren omenez, Gurutz Aginagalde klubeko presidentearen eta Julen Aginagaldearen amona.