Argazkia: Swim Camp Getxo

Pasa den asteburuan, hilaren 3an eta 4an, Kataluniako Master Txapelketan munduko errekor bat eta Europako beste bi ezarri zituen Mikel Bildosola igerilari getxoztarrak. Lehiaketa Bartzelonako Club Esportiu Mediterrani-ko 50 metroko igerilekuan izan zen, eta bertan aritu ziren Swim Camp Getxo taldeko Edorta de Miguel, Beñat Elorriaga eta Markel Brouard kirolariak ere. Laukoteak, gainera, Estatu mailako bi errekor gainditu zituen errelebotan, orotara getxoztarrek 6 errekor berri ezarri zituztelarik beraz.

Mikel Bildosolak irabazi zuen Txapelketako igerilari onenaren saria, 50 libreko munduko errekorra (40-44 urte) gainditu ondoren, 23”14′-ko markarekin. Gainera, bere mailako 100 libreko Europako errekorra hautsi zuen birritan, 4×100 libreko erreleboko lehen postan 52”16′-ko denborarekin eta banakako proban 51”70′ eginda.

Horrekin batera, Edorta de Miguelek Estau mailako errekor berria ezarri zuen, 45-49 urte artekoa, 50 bizkarreko proban, 28″06′-ko denbora eginda.

Hori gutxi balitz, taldeak 4×50 libreko eta 4×100 libreko erreleboetan Estatu mailako errekor berriak ezarri zituen, biak 160-199 kategorian, Mikel Bildosola, Edorta de Miguel, Beñat Elorriaga eta Markel Brouardek osatutako laukotearekin.